Novi broj e-časopisa: #4: Ako ste u Lici ispod Kapele bar jednom bili, zavolili ste taj naš zavičaj mili.

Mon, 22.08.2016. - 08:56 — Branka Pavlović

Leto se primiče kraju, evo jeseni samo ča ni. Nadam da vam ni prošlo onako „kadi si bil - nigdi, ča si napravil – niš!“. Letno doba inače je najaktivnije kad je delo u pitanju, al ni to više ni delo kej ča je nekad bilo. Uz sve te mašinerije, ima i više cajta i za druženja, samo ča smo se svi mi skvarili pa sve manje vremena provodimo jedni s drugimi, a više jedni dalje od drugi. A vlja će nam doć iz guzice u glavu pa da ti to prominimo i da shvatimo da smo jedni drugimi potrebni i za život i za delo i za veselje i za sve.

U ovom broju osvrnuli smo se na puno stvari iz prošlosti, isčeprkali nekakovi stari slik, tekstov.... Prisitili se naših dragi ljudi ki već dugo nema, al ki ostavili traga za sobom. Našeg dragog Zdrave Šare koji je život ostavil na Žutoj Lokvi skupa sa trojicom svojih kolega, ali ovde je i sjećanje jedinog preživilog policajca od tog krvoprolića, Darka Murata...da se nikad ne zaboravi.

Svoje mesto pod suncem, oću reć u ovom broju, našli su i oni ki su tek počeli povjest pisat u našem kraju, oni tek rođeni.

Kej po običaju, našle su se tote i brojne šale, izreke, a normalno i recept za jedno jilo. Ki je vidil gladan bilo ča delat, nu da li?

U letno doba puno je zborov po naši kraji, ča oni ča se držidu od davnine, ali ima i noviji, kej ča je Smotra folklora u Brinju. E i o tome smo nešto napisali i ubacili slike.

Isčeprkali smo neke stare tekstove ča su naši mladi koji živedu u brinjskom kraju napisali još dok su bili dica, a i neki stari „sportov“ ili bolje reć igar iz davnine kej ča je bacanje kamena s ramena.

Na pamet nam pala i pavenka, Majke Božje cveće. Znate ona ča za nju kažedu „teško curi ka je nosit neće“.

Eh, i sad nema druge nego da pritisnete taj link i vidite ča smo vam sve u ovom broju pripremili i da završim ovo svoje predstavljanje novoga broja besedom ku je napisal onaj mali ča je išal u Njemačku:

„Cajta više kajne već je prošlo ziben, pozdrav mili majne ja vas puno liben.“